ಮತ್ತೆ ಮತ್ತೆ ದೀಪಾವಳಿ.

ಈಗಿನ ದೀಪಾವಳಿ ಹೀಗೇ ಅಲ್ಲ
ನಮ್ಮ ನಿಮ್ಮ ಮಾತು ಹಳೆಯದಾಯಿತಲ್ಲ....
ಮಗಳು ಮಾಲಿಂಗನ ಬಳ್ಳಿ ನೋಡಿಲ್ಲ...
ಹಿತ್ತಾಳಿ ಕೊಳಗ ಹಂಡೆಗಳಿಗೆ ಮನೆ ಸಾಲದಲ್ಲ..
ಅಸಲು ತುಂಬಿಡಲು ನೀರೇ ಬಂದಿಲ್ಲ....!
ಆದರೂ ಇವಳು ಏಳುತ್ತಾಳೆ ಅವಳ ಎಬ್ಬಿಸುತ್ತಾಳೆ ಗದರಿ..
ಆರತಿ ಹಿಡಿದು ನಿಂತ ಮಗಳ ಕಣ್ಣಲ್ಲಿಣಕಿದೆ ಮುಗಿಯದ ನಿದ್ದೆ..
ಮುಂಜಾನೆಯ ಪೇಪರಿನಲ್ಲಿ ದೀಪ ಹಿಡಿದ ರೂಪದರ್ಶಿ..ಕೆಳಗೆ
ಅದೇ ಸುದ್ದಿ ಸಾವು ಸೂತಕ ಮೋದಿ ರಾಹುಲ್ ಸಿದ್ದು ಎದ್ದಾಯಿತು ನಿದ್ದೆಗೊಂದು ಗುದ್ದಿ...!
ಉಂಡಿ,ಚಕ್ಕಲಿ ಚೂಡ ಧಾರವಾಡದ ಪೇಡ....
ಶುಗರ್ ಲೆವಲ್ ತೂಕಹಾಕಿ ತಿನ್ನಬೇಕು ಜಾಸ್ತಿ ಬೇಡ..
ಅಳಿವಿನಂಚಿನ ಸಂಪ್ರದಾಯ ರಂಗೋಲಿ ಹಾಡು ನಗು ಎಲ್ಲ ಮಾಯ..
ಪಟಾಕಿ ತಯಾರಿಸುವವ ಬೆಂದರೂ ಸಿಡಿಯುತ್ತಾನೆ ಕಿಡಿಯಾಗಿ..
ಹೊಗೆ ವಾಸನೆ ಮಾಸ್ಕು ಹಾಕಿ ಬಾಂಬು ಹೊಡಿಯುವ ಖಯಾಲಿ...
ಬಿಡವಲ್ಲದು ಚಾಳಿ..ಪರ್ಯಾವರಣದ ಮಾನದ ಕಿಮ್ಮತ್ತು ಅರೆಪಾವಲಿ..
ಮುಗಿಯದ ಆಫರ್ರುಗಳ ಭರಾಟೆ ಕನ್ನಡ ಚಾನೆಲ್ ಹಾಕಿದರೆ ಅದೇ ಹಳೆ ಹರಟೆ...!
ಹಬ್ಬ ಮುಗಿಸಿ ಬಸ್ಸಿಳಿದವನ ಮುಖದಲ್ಲೂ ಸೋಲೇ ಇದೆ...
ಮತ್ತೆ ಮತ್ತೆ ಈ ದೀಪಾವಳಿ ಬರಲಿದೆ...

ಮತ್ತೆ ಮತ್ತೆ ಹೌದು ಮತ್ತೆ ಮತ್ತೆ...